講下小弟既跑法先，我主要係玩長途越野跑的，而跑姿係跟據POSE RUNNING METHOD腳前掌落地，以減低受傷及疲倦的。每個人跑姿方法都唔同，最緊要適合自己就得。

不過我對跑鞋就有比較嚴格，有以下幾點我係會特別注意的︰

- 鞋的舒適度及軟硬度

- 鞋的咬地程度及耐磨度

- 鞋對長途越野跑的保護 (包括疲倦度)

今次測試主要係試左ALTRA OLYMPUS 1.5，我被其厚厚的雙層A-Bound 厚底所吸引，一著上腳第一個感覺係好寬，鞋頭設計好有空間感，唔會有夾腳既感覺出現，就算腳掌好厚好大的跑友都非常適合。想試一試呢對鞋係因為我本身都有對HOKA Mafate，但HOKA個對我有少少夾腳問題，同埋腳掌落斜時會向前移頂住腳指(鞋帶已拉緊)，所以想比較一下ALTRA呢對會唔會有更加好的表現。

厚底鞋最重要既任務就係減低腳部既疲倦感覺，尤其係落山既時候呢種感覺就更加明顯!! 今次短短地試左15KM既山路測試，有平路，上落斜，樓梯等，試下對鞋既反應同埋用後感同大家分享一下啦

1. 物料

ALTRA鞋既面料感覺幾輕同舒服，重量亦較同類型厚底鞋輕一點點，鞋籠裹面亦無磨腳同焗既感覺，咁樣對香港潮濕既天氣好有幫助，透氣度高既鞋無咁容易會起水泡及磨損的。

2. 鞋底

非常簡單，夠咬地我就非常收貨。今次測試過上斜，落斜過大石，其鞋底穩定程度都唔錯，起初我會好擔心鞋頭太寬會腳感唔好，令到跑個陣要好小心，但實測後ZERO DROP本身增加了腳本身的平衡力，落腳時都好有信心，而且一般石地沙地咬地能力都唔錯，濕滑青苔地面就始終要小心一D，整體感覺都非常良好。

3. 厚底

唔駛講都知厚底既吸震能力一流啦，對上落多既路段真係非常有幫助，如果對上落肌肉負荷易抽筋/疲倦既跑友黎講真係恩物!! 平路黎講當然不能與一般跑鞋/薄底鞋比較，但同類型厚底鞋佢屬於”好好去”既類型，影響相對較細。不過在操控方面，多轉彎路段始終腳感都係爭DD，不過呢樣值得取捨既。

ALTRA OLYMPUS其他特點

ALTRA OLYMPUS有幾個特點係仲未試到的，亦可以響度同大家講講的，佢有專用魔術貼可以配合原裝的GAITER使用，可以防止沙石入鞋的問題。鞋底的鞋尾部份設計較為長身，對比較斜既路可以增加承托力，更加慳力。不過今次路程較短及路況比較靚，未有機會測試到，留待下一次比賽才可以再測試一下。

總結黎講，厚底鞋的出現令跑友們增加多一種選擇，增加避震對容易受傷的跑友亦好有幫助，難得今次呢對ALTRA OLYMPUS唔駛用好長時間就好容易令人適應，對於有著開HOKA既跑友絕對係另一更好選擇，如果腳掌大既更加係超級恩物!!